Khmer
English
Chinese
Frence
Vietnamese
Thai
ទឹកជំនន់ប៉ះពាល់តិចតួចដល់កំណើនសេដ្ឋកិច្ចកម្ពុជា
ដោយ ៖ កាំង សុធា ថ្ងៃទី 11 វិច្ឆកា 2011ម៉ោង 08:59:46
ស្ថានភាពទឹកជំនន់ប៉ុន្មានខែកន្លងមកនេះបានពន្លិចខេត្ដក្រុងមួយចំនួនរបស់កម្ពុជាពិសេស ខេត្ដផលិតស្រូវធំៗអស់ជាច្រើនម៉ឺនហិកតា និងបណ្ដាហេដ្ឋារចនាសម្ពន្ធសង្គមអស់ច្រើនជាងពេលដែលទទួលរងគ្រោះដោយព្យុះកេតសាណាទៅទៀតដែលជាហេតុធ្វើឱ្យកំណើនសេដ្ឋកិច្ចដែលធ្លាប់ទាយថានឹងមានក្នុងរង្វង់៧%ចុះមកនៅត្រឹម៦%វិញតែប៉ុណ្ណោះ។ ទោះជាយ៉ាងនេះក្ដីគេនៅតែគិតថាវាប៉ះពាល់តិចតួចជាងនៅប្រទេសថៃ។ ហើយប្រមុខរាជរដ្ឋាភិបាលក៏សម្រេចចិត្ដផ្អាកពិធីបុណ្យអុំទូក ដើម្បីស្ដារការងារធ្វើកសិកម្មឱ្យទាន់ ពេលវេលាប៉ះប៉ូវបង្គ្រប់ផែនការនាំអង្ករចេញ។
ដោយយោងតាមប្រសាសន៍របស់ លោកឧបនាយករដ្ឋមន្ដ្រី គាត ឈន់ រដ្ឋមន្ដ្រី ក្រសួងសេដ្ឋកិច្ចនិងហិរញ្ញវត្ថុថា កំណើនសេដ្ឋកិច្ចកម្ពុជានៅឆ្នាំ២០១១ អាចនឹងប៉ះពាល់ដោយសារតែឥទ្ធិពលនៃគ្រោះទឹកជំនន់។ ប៉ុន្ដែកំណើនសេដ្ឋកិច្ចកម្ពុជាក៏នឹងមានកំណើនខ្ពស់រហូតដល់ ៦% នឹងមានសមត្ថភាពប្រកួតប្រជែងខ្ពស់ជាងមុន ដោយមានអតិផរណាក្នុងកម្រិតតួលេខ១ខ្ទង់ ព្រមទាំងធានាសម្រេចឱ្យបាននូវការកាត់បន្ថយភាពក្រីក្រលើស១% ក្នុង១ឆ្នាំ និងការធានាកែលម្អសូចនាករសំខាន់ៗក្នុងវិស័យសង្គមកិច្ច ជាពិសេសក្នុងវិស័យអប់រំសុខាភិបាល និងសមភាពយ៉េនឌ័រ។
ការលើកឡើងនេះគឺក្នុងពិធីបើកសិក្ខាសាលាកាលពីថ្ងៃទី១១ ខែតុលា ឆ្នាំ២០១១ នៅសណ្ឋាគារអ៊ីនធឺកុងទីណង់តាល់។ លោក គាត ឈន់ បានមានប្រសាសន៍បន្ដថា ជាក់ស្ដែងសេដ្ឋកិច្ចកម្ពុជាបានងើបឡើងវិញយ៉ាងឆាប់រហ័សពី ១% នៅឆ្នាំ២០០៩ ទៅ ៦%នៅឆ្នាំ២០១០ ដែលធ្វើឱ្យនិន្នាការកំណើននេះមានទម្រង់ជាអក្សរ V ដែលប្រការនេះបានមកដោយសារការងើបឡើងវិញនៃកំណើនផ្នែកឧស្សហកម្មកាត់ដេរពី ៩%ទៅ ១៨.៥% និងកំណើនផ្នែកសេវាកម្មទេសចរណ៍ពី ៣% ទៅ ៧% ទោះជាការងើបឡើងវិញនៃផ្នែកឧស្សាហកម្មសំណង់ និងផ្នែកសេវាកម្មអចលនទ្រព្យមិនទាន់ប្រាកដប្រជាក៏ដោយ។
លោក គាត ឈន់ មានប្រសាសន៍ទៀតថា នៅក្នុងឆ្នាំ២០១១នេះ កំណើនសេដ្ឋកិច្ចកម្ពុជាត្រូវបានរំពឹងថាអាចឡើងជិត ៧%ប៉ុន្ដែ ដោយសារភាពមិនប្រាកដប្រជានៃសេដ្ឋកិច្ចសហរដ្ឋអាមេរិកនិងសហគមន៍អឺរ៉ុប និងដោយសារផលប៉ះពាល់ពីទឹកជំនន់យ៉ាងធ្ងន់ធ្ងរត្រូវបានគណនាស្ថិតក្នុងរង្វង់ ៦% វិញ។
លោករដ្ឋមន្ដ្រី បានបញ្ជាក់ថា តាមការគណនាវិស័យឧស្សហកម្មនឹងកើនឡើងប្រមាណ ៨.៥%ធៀបនឹង ១៣ក្នុង ឆ្នាំ២០១០ ដែលក្នុងនោះផ្នែកឧស្សហកម្មកាត់ដេរ នឹងមានកំណើន ១១.២%ធៀបនឹង ១០.៤% ក្នុងឆ្នាំ២០១០។ វិស័យកសិកម្ម នឹងមានកំណើនប្រមាណ ៣.៦% ធៀប នឹង ៤% ក្នុងឆ្នាំ២០១០ ។ ផ្នែកសេវាកម្មទេសចរណ៍ នឹងមានកំណើនប្រហាក់ប្រហែល នឹងឆ្នាំ២០១០ គឺ៦.៧% ។
សូមបញ្ជាក់ថា បើតាមលោកឧបនាយករដ្ឋមន្ដ្រី សុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី បានមានប្រសាសន៍នៅក្នុងពិធីសន្និសីទស្ដីពីពាណិជ្ជកម្មនិងការវិនិយោគឆ្នាំ២០១១ថា ប្រទេសកម្ពុជាត្រូវបានគេទទួលស្គាល់ថាជាកូនខ្លានៅក្នុងការផលិត វាយនភ័ណ្ឌ។
លោកឧបនាយករដ្ឋមន្ដ្រី សុខ អាន បានលើកឡើងទៀតថា នៅក្នុងរបាយការណ៍ដែលបានផ្សាយកាលពីឆ្នាំទៅ យូប៊ីអេស ដែលបានបង្ហាញថា ប្រទេសកម្ពុជាបានបង្កើនខ្លួនឯង ហើយជាកូនខ្លាមួយនៅក្នុងការកែច្នៃវាយនភ័ណ្ឌ ហើយអ្នកវិនិយោគមួយចំនួន ក៏បានសម្លឹងមើលផងដែរ។
លោក គាត ឈន់ បានបញ្ជាក់ទៀតថា អត្រាប្ដូរប្រាក់ត្រូវបានរក្សាឱ្យមានស្ថិរភាពធៀបនឹងប្រាក់ដុល្លារ។ អតិផរណាជាមធ្យមប្រចាំ ឆ្នាំត្រូវបានរក្សាក្នុងរង្វង់ ៥.៥% រូបិយវត្ថុទូទៅដែលរួមផ្សំដោយប្រាក់បញ្ញើរបស់អតិថិជនក្នុងប្រព័ន្ធធនាគារបានកើនឡើងពី ៤ពាន់លានដុល្លារនៅឆ្នាំ២០១០ ដល់ ៤.៧ពាន់លានដុល្លារ គណនាត្រឹមខែសីហាឆ្នាំ២០១១។ ទុនបំរុងអន្ដរជាតិសរុបបានបន្ដកើនឡើងដល់ប្រមាណ ៣ពាន់លានដុល្លារ គណនាត្រឹមខែតុលាដែលអាចទប់ការនាំចូលបានជាង៤ខែ ។
សូមបញ្ជាក់ថា លោកទេសរដ្ឋមន្ដ្រី ញឹម វណ្ណដា អនុប្រធានទី១ គណៈកម្មាធិការជាតិគ្រប់គ្រងគ្រោះមហន្ដរាយ កាលពីថ្ងៃទី១០ ខែតុលា ឆ្នាំ២០១១ បានបញ្ជាក់ថាមានពលរដ្ឋដែលស្លាប់នៅក្នុងគ្រោះទឹកជំនន់បានកើនដល់ទៅ ២០៧នាក់ និងមានការខូចខាត គិតជាទឹកប្រាក់ប្រមាណ ១៦១លានដុល្លារអាមេរិក ដែលប្រហាក់ប្រហែលនឹងការខូចខាតដោយគ្រោះទឹកជំនន់ កាលពីឆ្នាំ២០០០។
គួរបញ្ជាក់ឱ្យដឹងថា វិទ្យាស្ថានសេដ្ឋកិច្ចកម្ពុជា (EIC) ធ្លាប់បានព្យាករណ៍ថា ផលិតផលក្នុងស្រុកសរុប (GDP) របស់កម្ពុជានៅឆ្នាំ២០១១ នេះអាចនឹងកើនឡើងដល់៨.៧ ភាគរយដែលអនុវិស័យវាយនភណ្ឌ និងសម្លៀកបំពាក់ជាអ្នករុញកំណើនសេដ្ឋកិច្ច។ ប៉ុន្ដែ រដ្ឋាភិបាលបានព្យាករណ៍ថា កំណើនសេដ្ឋកិច្ចមានត្រឹមតែ៦ភាគរយ មូលនិធិហិរញ្ញវត្ថុអន្ដរជាតិ (IMF) ធនាគារពិភពលោក និង ធនាគាអភិឌ្ឍន៍អាស៊ី បានព្យាករណ៍មានត្រឹមតែ ៦.៥ ភាគរយតែប៉ុណ្ណោះ។ ជាងនេះទៅទៀត ធនាគារអភិវឌ្ឍន៍អាស៊ី ធនាគារ ពិភពលោក មូលនិធិរូបិយវត្ថុអន្ដរជាតិ ក៏បានដាក់ការព្យាករណ៍របស់ខ្លួនចំពោះកំណើនសេដ្ឋកិច្ចរបស់កម្ពុជានៅឆ្នាំ២០១១នេះថាមាន៦.៥ភាគរយដូចៗគ្នាផងដែរ។
ប៉ុន្ដែការព្យាករណ៍ទាំងនេះហាក់ដូចជាខុសស្រឡះនៅពេលកម្ពុជាជួបនឹងគ្រោះទឹកជំនន់អស់រយៈពេលជាច្រើនលើកកន្លងមកនេះ ពីព្រោះវាប៉ះពាល់ដល់វិស័យកសិកម្មដែលជាវិស័យចំបងរបស់កម្ពុជា ៕
.jpg)
