Khmer
English
Chinese
Frence
Vietnamese
Thai
ដំណាំស្វាយចន្ទី: ប្រភពចំណូលថ្មីសម្រាប់កសិករ
ដោយ ៖ កាំង សុធា ថ្ងៃទី 11 វិច្ឆកា 2011ម៉ោង 09:28:36
ស្វាយចន្ទីកម្ពុជាអាចលក់បានក្នុងតំលៃកាន់តែខ្ពស់ផងដែរ ប្រសិនបើស្វាយចន្ទីនោះត្រូវគេបញ្ជាក់ថា ជាស្វាយចន្ទីសរីរាង្គ។ គ្រួសារកសិករដាំស្វាយចន្ទីភាគច្រើនប្រើប្រាស់ថ្នាំគីមីតិចតួច ឬមិនប្រើសោះតែម្ដង។ ដូច្នេះផលិតផលភាគច្រើនគឺជាផលិតផលសរីរាង្គ។
ស្វាយចន្ទីកម្ពុជា អាចលក់បានក្នុងតំលៃកាន់តែខ្ពស់ប្រសិនបើស្វាយចន្ទីនោះត្រូវគេបញ្ជាក់ថា ជាស្វាយចន្ទីសរីរាង្គ។ នេះគឺជា ប្រយោគមួយដែលបានថ្លែងដោយលោករាហ្វែល ដូចាវ ម៉ូរេណូ (Rafael Dochao Moreno) ភារៈធារីនៃប្រតិភូសហភាពអឺរ៉ុបប្រចាំកម្ពុជា។
លោកមានប្រសាសន៍ទៀតថា គ្រួសារកសិករដាំស្វាយចន្ទីភាគច្រើនប្រើប្រាស់ថ្នាំគីមីតិចតួចឬមិនប្រើសោះតែម្ដង។ ដូច្នេះ ផលិតផលភាគច្រើនគឺជាផលិតផលសរីរាង្គ។ លទ្ធផលទទួលបានពីការបណ្ដុះបណ្ដាលកសិករដាំដុះស្វាយចន្ទីជាង៤០០០គ្រួសារបង្ហាញឱ្យឃើញថា ការទទួលវិញ្ញាបនបត្រសរីរាង្គសំរាប់កសិករអាចសំរេចបានយ៉ាងល្អ ហើយការកែលំអសាមញ្ញៗលើបច្ចេកទេសដាំដុះ ការប្រមូលផល និងការទុកដាក់អាចធ្វើឱ្យផលិតកម្មស្វាយចន្ទីមានភាពល្អប្រសើរយ៉ាងច្រើន។
លោកឆាល ស្នៃឌ័រ (Chales Schneider) តំណាងស្ដីទីរបស់សារជីវកម្មហិរញ្ញវត្ថុអន្ដរជាតិប្រចាំនៅកម្ពុជា មានប្រសាសន៍ថា តម្រូវការស្វាយចន្ទីលើពិភពលោកក្នុងរយៈពេលវែងកំពុងតែមានកំណើនឡើង។ នេះជាកាលានុវឌ្ឍភាពរបស់កម្ពុជាក្នុងការទាញយកអត្ថប្រយោជន៍ពីនិន្នាការនេះតាមរយៈការជំរុញឱ្យមានការកែច្នៃកាន់តែច្រើនឡើងនៅក្នុងប្រទេសជាជាងការនាំចេញស្វាយចន្ទី មិនទាន់កែច្នៃស្ទើរតែទាំងអស់ទៅឱ្យប្រទេសផ្សេងកែច្នៃនិងលក់ទៅប្រទេសទីបី។ ពេលបច្ចុប្បន្ន ជាពេលវេលាដ៏ប្រសើរសម្រាប់កម្ពុជា ក្នុងការបង្កើតឱ្យមានឧស្សាហកម្មកែច្នៃស្វាយចន្ទីដែលមានលក្ខណៈប្រកួតប្រជែង ព្រោះថាតម្រូវការ និងតម្លៃនៅលើទីផ្សារអន្ដរជាតិមានលក្ខណៈល្អប្រសើរនិងច្បាស់លាស់ ។
លោកបន្ថែមថាប្រសិនបើម្ចាស់សិប្បកម្មកែច្នៃក្នុងស្រុក អាចបំពេញបានតាមបទដ្ឋានអន្ដរជាតិលើផ្នែកអនាម័យ សុខភាព និង សុវត្ថិភាព ពួកគាត់អាចធានាចំពោះខ្លួនគាត់ថា គាត់នឹងមានទីផ្សារដែលគួរឱ្យជឿជាក់បាននិងតម្លៃខ្ពស់ ។ ទាំងនេះអាចជួយ ពង្រីក វិស័យស្វាយចន្ទីក្នុងស្រុក បង្កើតការងារ និងបង្កើនប្រាក់ចំណូលយ៉ាងច្រើនដល់កសិករដាំស្វាយចន្ទី ។
ដោយយោងតាមការសិក្សាមួយកាលពីពេលថ្មីៗនេះ ដោយសារជីវកម្មហិរញ្ញវត្ថុអន្ដរជាតិរួមសហការជាមួយសហភាពអឺរ៉ុប ហ្វាំងឡង់ អៀកឡង់ ហូល្លង់ ណូវែលហ្សេឡង់ និងស្វីស និងក្រសួងឧស្សាហកម្មរ៉ែនិងថាមពល បង្ហាញថា នៅក្នុងវិស័យស្វាយចន្ទីកម្ពុជាគម្រោងបានជួយពង្រីកសមត្ថភាពសមាគមស្វាយចន្ទី និងក្រុមហ៊ុនស្វាយចន្ទី ដែលទើបបង្កើតថ្មី និងកំពុងរីកលូតលាស់ខ្លាំង ដើម្បីឱ្យពួកគេអាចបណ្ដុះបណ្ដាល និងផ្ដល់ការគាំទ្រដល់កសិករខ្នាតតូចតាចក្នុងទំរង់ផ្សេងៗទៀត ។
ជាការពិត នៅប្រទេសកម្ពុជាគេអាចដាំដំណាំមួយប្រភេទនេះបានគ្រប់តំបន់ប៉ុន្ដែអ្វីដែលធ្វើឱ្យគេកត់សម្គាល់បាននោះគឺនៅខេត្ដរតនគីរី មួយរយៈកាលចុងក្រោយនេះដំណាំស្វាយចន្ទី បាននិងត្រូវបានកសិករយកចិត្ដទុកយ៉ាងខ្លាំង។ ស្វាយចន្ទី បាននិងកំពុងត្រូវបានឈ្មួញ ដើរម៉ៅចម្ការនានា ដោយឱ្យតម្លៃរហូតដល់ ៥០០០រៀលក្នុង១គីឡូក្រាម ។
លោក សយ សូណា ប្រធានមន្ទីរកសិកម្មខេត្ដរតនគីរី បានមានប្រសាសន៍ថា ផលដំណាំស្វាយចន្ទីមានការកើនឡើងច្រើន។
ស្វាយចន្ទីដែលអាចប្រមូលផលបាននៅទូទាំងខេត្ដរតនគីរីមានចំនួន ១៥.៨៧៥ ហិកតា ដោយក្នុង១ហិកតាជាមធ្យមបានផល ៥០០គីឡូក្រាម។ លោកបានឱ្យដឹងទៀតថា មានឈ្មួញដើរម៉ៅចម្ការស្វាយចន្ទីហើយដោយគេឱ្យតម្លៃគ្រាប់ស្វាយចន្ទី១គីឡូក្រាម ៥០០០ រៀលគឺបានថ្លៃជាងមុនដល់ទៅប្រមាណជា២០០០រៀល។ កាលពីឆ្នាំ២០១០ គ្រាប់ស្វាយចន្ទី១គីឡូក្រាមបានថ្លៃតែប្រមាណជា ៣០០០រៀលទេ ហើយនៅទូទាំងខេត្ដប្រមូលផលបានចំនួនប្រមាណជា ៨.៤០០តោន។ ដំណាំស្វាយចន្ទីនៅខេត្ដរតនគីរីប៉ុន្មានឆ្នាំចុងក្រោយនេះ មិនមានការដាំថ្មីបន្ថែមទេហើយក៏មិនមានចលនាកាប់ចោលដោយរូបភាពធំដុំ ដើម្បីដាំដំណាំអ្វីផ្សេងទៀតដែរ។
សូមបញ្ជាក់ថា តាមរយៈការសិក្សារបស់សារជីវកម្មហិរញ្ញវត្ថុអន្ដរជាតិ (IFC) ដែលជាសមាជិករបស់ក្រុមធនាគារពិភពលោក បាន បង្ហាញថាឧស្សាហកម្មស្វាយចន្ទីកម្ពុជាអាចរកប្រាក់ចំណូលបានពី៣០ទៅ៤០លានដុល្លារ បន្ថែមទៀតក្នុងមួយឆ្នាំ និងអាចជួយបង្កើនប្រាក់ចំណូលដល់ប្រជាជនក្រីក្រ បើសិនជាមានការកែច្នៃកាន់តែច្រើនឡើងនៅកម្ពុជា។
-គុណប្រយោជន៍គ្រាប់ស្វាយចន្ទី
គ្រាប់ស្វាយចន្ទីមានផ្ទុកទៅដោយខ្លាញ់ monounsaturated ដែលល្អចំពោះសុខភាព សរសៃឈាមបេះដូង ពីព្រោះខ្លាញ់ monounsaturated កាត់បន្ថយកម្រិត triglyceride ខ្ពស់ដែលជាប់ទាក់ទងនឹងការបង្កើនគ្រោះថ្នាក់នៃជំងឺបេះដូង។ គ្រាប់ ស្វាយចន្ទីសំបូរទៅដោយអង់ទីអុកស៊ីឌែន (antioxidants) ដែលជួយកំចាត់ចោលនូវរ៉ាឌីកាល់សេរី (free radicals) ដែលអាច ជាមូលហេតុនៃមហារីកមួយចំនួន។
គ្រាប់ស្វាយចន្ទីជាអាហារថាមពល គ្មានកូឡេស្ដេរ៉ូលជួយរក្សាសុខភាពអញ្ចាញធ្មេញ និងធ្មេញបានល្អ។ គ្រាប់ស្វាយចន្ទីជាប្រភពនៃម៉ាញេស្យូម (magnesium) ដែលជាតិខនិជនេះធ្វើការជាមួយនឹងកាល់ស្យូម (calcium) ដើម្បីជួយផ្ដត់ផ្គង់ដល់សាច់ដុំ និងឆ្អឹងនៅក្នុងខ្លួនឱ្យមានសុខភាពល្អ។
គ្រាប់ស្វាយចន្ទីមានកំហាប់ថាមពលខ្ពស់ និងមានចំនួនជាតិសរសៃខ្ពស់សម្រាប់ការតមអាហារ ដោយវាមានទាំងកំហាប់ថាមពល និងចំនួនជាតិសរសៃខ្ពស់គឺអាចចាត់ទុកថា វាមានប្រសិទ្ធភាពចំពោះការគ្រប់គ្រងទម្ងន់ ប៉ុន្ដែនៅពេលដែលទទួលទានល្មមតែប៉ុណ្ណោះ។
គ្រាប់ស្វាយចន្ទីគឺមានផ្ទុកជាតិទង់ដែងខ្ពស់ គឺសំខាន់ក្នុងការផលិតថាមពលអាចផ្លាស់ប្ដូរបាននៅក្នុងបំពង់សរសៃឈាម ឆ្អឹង និងសន្លាក់ឆ្អឹង។ ការបរិភោគគ្រាប់ស្វាយចន្ទីជួយរាងកាយប្រើប្រាស់ជាតិដែកដើម្បីកំចាត់នូវរ៉ាឌីកាល់សេរី និងជួយឱ្យឆ្អឹង មានការលូតលាស់ ៕
.jpg)