Khmer
English
Chinese
Frence
Vietnamese
Thai
កម្លាំងចម្រុះខេត្ដឆ្មក់ចូលលំនៅឋានទិញលក់សត្វព្រៃចាប់បានសត្វជាច្រើនប្រភេទ
ដោយ ៖ ស៊ាងឡាយ ថ្ងៃទី 04 កក្កដា 2012ម៉ោង 15:50:23
ខេត្ដក្រចេះ ៖ សមត្ថកិច្ចចម្រុះរួមមានកម្លាំងកងរាជអាវុធហត្ដលើផ្ទៃប្រទេស អង្គការរវ៉ាយអេត និងកម្លាំងរដ្ឋបាលព្រៃឈើថ្នាក់កណ្ដាលខេត្ដក្រចេះ ដឹកនាំដោយលោកអ៊ូ វណ្ណារ៉ត មន្ដ្រីរដ្ឋបាល ព្រៃឈើថ្នាក់កណ្ដាលខេត្ដបានឆ្មក់ចូលលំនៅឋានរបស់ជនសង្ស័យមួយកន្លែង ដែលលួចលាក់ជួញដូរសត្វព្រៃខុសច្បាប់ កាលពីព្រឹកថ្ងៃទី៤ ខែកក្កដា ឆ្នាំ២០១២ ស្ថិតក្នុងភូមិត្រញំងព្រីង សង្កាត់ក្រចេះ ក្រុងក្រចេះ ។
ក្នុងការចុះឡោមព័ទ្ធលំនៅឋានទិញដុកសត្វព្រៃខុសច្បាប់ខាងលើសមត្ថកិច្ច បានរុករកឃើញសត្វព្រៃជាច្រើនប្រភេទ រួមមានសត្វអណ្ដើក, សត្វត្រកួត, សត្វពស់ និងសត្វកន្ថាយ សរុបទាំងអស់ទម្ងន់៧៦គីឡូក្រាម ។ មន្ដ្រីកងរាជអាវុធហត្ថលើផ្ទៃប្រទេសបានប្រាប់ឱ្យដឹងថា ជនសង្ស័យរកស៊ីទិញលក់ស្ដុកទុកសត្វព្រៃខាងលើនេះឈ្មោះជា ណាវី ភេទស្រី អាយុ១៨ឆ្នាំ រស់នៅភូមិត្រញំងព្រីង សង្កាត់-ក្រុងក្រចេះ ហើយត្រូវបានឃាត់ខ្លួនយកមកសាកសួរ ។
អ្នកភូមិរស់នៅក្បែផ្ទះជនសង្ស័យបានប្រាប់ឱ្យដឹងថា ឈ្មោះជា ណាវី នេះ បានប្រកបរបរទិញសត្វព្រៃខុសច្បាប់ យកមកស្ដុបទុកក្នុងលំនៅឋានរបស់ខ្លួនជាយូរមកហើយ ពុំដែលបានឃើញសមត្ថកិច្ចណាចុះមកបង្ក្រាបនោះទេ ទើបតែថ្ងៃនេះឈ្មួញខាងលើត្រូវបានកម្លាំងចម្រុះឡោមព័ទ័ចាប់នឹងរឹបអុសបានសត្វព្រៃជាច្រើនប្រភេទ ។ សត្វទាំងនេះត្រូវបានឈ្មួញទិញបន្ដពីអ្នកភូមិ ដែលរស់នៅក្នុងព្រៃ លុះទិញស្ដុកទុក បានច្រើនទើបឈ្មួញខាងលើយកទៅលក់បន្ដឱ្យឈ្មួញនៅប្រទេសវៀតណាម ។
មន្ដ្រីអង្គការរវ៉ាយអេតបានប្រាប់ឱ្យដឹងថា សត្វព្រៃដែលសមត្ថកិច្ចរឹបអូស បានទាំងអស់នេះខាងអង្គការរបស់លោក នឹងរៀបចំគំរោងយកទៅព្រលែងនៅក្នុងព្រៃវិញ ចំណែកឯជនសង្ស័យខាងលើត្រូវបាននាំខ្លួនមកសាកសួរទៅតាមនីតិវិធីច្បាប់ ៕
.jpg)
