Khmer
English
Chinese
Frence
Vietnamese
Thai
ខូចចិត្ដខាងស្រីផ្ដាច់ពាក្យលេបថ្នាំសម្លាប់ខ្លួនដឹងដល់មាសស្ងួនផឹកប្រេងម៉ាស៊ីនប៉ងសម្លាប់ខ្លួនដែរ
ដោយ ៖ ទាវ-ស្អាងជ័យ ថ្ងៃទី 17 សីហា 2012ម៉ោង 07:08:28
ខេត្ដកណ្ដាល ៖ “បងស្ម័គ្រអូនស្មោះ តែទាស់ចាស់ៗ ចិត្ដស្រាលប្ដូរផ្លាស់យកជំនូនថ្មី ស្រឡាញ់មាសពេជ្រជាជាងភក្ដី រៀបការកូនស្រីជាមួយដុល្លារ...” ។ នេះជាបទចម្រៀងរបស់លោក អ៊ឹង ណារី ក្រោមចំណងជើងថា “ខ្មាសអស់បក្សា” ដែលលោកបានច្រៀងកាលពីអំឡុងទសវត្ស៧០ ។ បើទោះបីជាអតីតសិល្បកររូបនេះបានលាចាកលោកនេះទៅហើយក្ដី ប៉ុន្ដែបទចម្រៀងរបស់លោក នៅតែដិតដក់ក្នុងអារម្មណ៍ប្រជាពល រដ្ឋខ្មែរស្ទើរតែគ្រប់រូបនៅឡើយ ។ ម្យ៉ាងទៀតបទចម្រៀងនេះក៏បានឆ្លុះបញ្ចាំងពី តថភាពសង្គម ជាពិសេសរឿងរ៉ាវស្នេហា របស់យុវវ័យ តួយ៉ាងដូចជាស្នេហា កំលោះក្រមុំមួយគូ ដែលភាគីកូនកំលោះ បានឱ្យចាស់ទុំចូលស្ដីដណ្ដឹងកូនក្រមុំតាម លំអានប្រពៃណីដើម្បីយកគ្នាធ្វើជាគូគាប់ កល្យាណថ្ងៃអនាគត ពេលក្រុមគ្រួសារ កូនកំលោះបានភ្ជាប់ពាក្យអស់រយៈពេល ជិត១ឆ្នាំកន្លងមកស្រាប់តែចាស់ទុំខាង ស្រីឃើញកំលោះរូបនោះតែងតែដើរផឹក ស៊ីស្រវឹងស្ទើរមិនសល់ថ្ងៃ ទើបធ្វើឱ្យ ចាស់ទុំខាងស្រីបានផ្ដាច់ពាក្យវិញ។
ក្រោយពេលចាស់ទុំខាងស្រីផ្ដាច់ពាក្យអស់រយៈពេល៥ថ្ងៃកន្លងមក បណ្ដាលឱ្យកំលោះរូបនោះខូចចិត្ដយ៉ាងខ្លាំងគិតអ្វី ក៏មិនចេញក៏ដាច់ចិត្ដទៅទិញថ្នាំបំពុលមកលាយជាមួយទឹកលេបសម្លាប់ខ្លួន បានសម្រេចដូចបំណង ។ ការលេបថ្នាំសម្លាប់ខ្លួននេះបានឮ ដល់គូដណ្ដឹងខាងស្រីថា គូដណ្ដឹងរបស់ នាងបានលេបថ្នាំសម្លាប់ខ្លួនស្លាប់បាត់ ទៅហើយធ្វើឱ្យនាងមានក្ដីរន្ធត់យ៉ាងខ្លាំង ហើយទំនងចង់បញ្ជាក់ពីក្ដីស្មោះស្ម័គ្រ ដូចនាងទាវចំពោះទុំផងនោះក៏បានទៅ យកប្រេងរំអិលចាក់ម៉ាស៊ីនដេរមកផឹក ដើម្បីសម្លាប់ខ្លួនតាមគូស្នេហ៍ដែរ ។ ប៉ុន្ដែការប៉ុនប៉ងនេះមិនបានសម្រេចទេ ព្រោះក្រុមគ្រួសារដឹងទាន់ដឹកយកទៅ សង្គ្រោះនៅមន្ទីរពេទ្យព្រះកុសុមៈ ។
ហេតុការណ៍ភ្ញាក់ផ្អើលគូស្នេហ៍មួយ គូដែលលេបថ្នាំសម្លាប់ខ្លួននេះបានកើត ឡើងកាលពីវេលាម៉ោង៤និង២០នាទី ទៀបភ្លឺ ថ្ងៃទី១៦ ខែសីហា ឆ្នាំ២០១២ ស្ថិតនៅភូមិថ្មី ឃុំបែកចាន ស្រុកអង្គស្នួល ខេត្ដកណ្ដាល ។
តាមប្រភពព័ត៌មានពីអ្នកជិតខាង បានឱ្យដឹងថា កំលោះដែលដាច់ចិត្ដលេប ថ្នាំសម្លាប់ខ្លួន ព្រោះតែគ្រួសារខាងស្រី ផ្ដាច់ពាក្យនោះឈ្មោះ កើត សាវី អាយុ ២២ឆ្នាំ ជាកម្មកររោងចក្រ រស់នៅ ក្នុងភូមិ-ឃុំកើតហេតុខាងលើ។ កំលោះ កើត សាវី បានលេបថ្នាំពុលអស់១ កញ្ចប់ក្រោយពេលបញ្ជូនទៅដល់មន្ទីរ ពេទ្យបានបន្ដិច ដោយថ្នាំជ្រាបចូលដល់ បេះដូងក៏ដាច់ខ្យល់ស្លាប់តែម្ដង។ ចំណែកនារីដែលផឹកប្រេងម៉ាស៊ីនប៉ង សម្លាប់ខ្លួនតាមគូដណ្ដឹងដែរនោះឈ្មោះ អុល ផល្លី អាយុ២៣ឆ្នាំ ជាកម្មការិនី រោងចក្រ រស់នៅភូមិ-ឃុំជាមួយគ្នា ។
ប្រភពដដែលបានបន្ដទៀតថា គូ ដណ្ដឹង១គូនេះបានភ្ជាប់ពាក្យតាំងពីខែ វិច្ឆិកាឆ្នាំ២០១១មកម្ល៉េះ ហើយមាន គម្រោងរៀបការនៅចុងឆ្នាំនេះ តែមក ដល់វេលាម៉ោង៧និង៣០នាទីយប់ថ្ងៃទី១២ ខែសីហា ឆ្នាំ២០១២ ខាងស្រីក៏បាន ផ្ដាច់ពាក្យវិញ ដោយមិនពេញចិត្ដកូន ប្រុសផឹកពេក ។ លុះមកដល់ថ្ងៃកើត ហេតុទំនងជាតូចចិត្ដ និងខ្មាសអ្នកជិតខាងផង កំលោះរងគ្រោះក៏បានទិញថ្នាំ បំពុលកុក២កញ្ចប់១កញ្ចប់តម្លៃ៥០០ រៀលមកលាយជាមួយទឹកដាក់ក្នុងចាន ចង្កឹះផឹកដើម្បីបញ្ចប់ជីវិត ។
ពេលផឹកថ្នាំពុលរួចហើយជនរងគ្រោះ ក៏បានដើរទៅអង្គុយលើអង្រឹងពេលនោះប្អូនប្រុសឃើញមានការសង្ស័យថា បង ប្រុសពិតជាលេបថ្នាំពុល ព្រោះឃើញ បែកពពុះមាត់ស្គុលទៅហើយ ។ លុះ ឃើញដូចនេះសាច់ញាតិក៏ខិតខំយកម៉ូតូឌុបទៅមន្ទីរពេទ្យបង្អែកស្រុកអង្គស្នួល តែដោយមន្ទីរពេទ្យមិនហ៊ានទទួលក៏ បញ្ជូនមកកាន់មន្ទីរពេទ្យព្រះកុសុមៈ តែជាអកុសល ដោយជាតិថ្នាំបានជ្រាប ចូលពេញខ្លួនក្រុមគ្រូពេទ្យអស់លទ្ធភាពជួយសង្គ្រោះរហូតមកដល់ម៉ោង៧ព្រឹក ថ្ងៃដដែលជនរងគ្រោះក៏ដាច់ខ្យល់ស្លាប់ទៅ ។
ប្រភពព័ត៌មានបានឱ្យដឹងទៀតថា ករណីស្លាប់របស់កំលោះនោះក៏បាន លេចឮដល់នាង អុល ផល្លី ជាគូដណ្ដឹង ធ្វើឱ្យនារីរូបនោះកើតក្ដីក្ដុកក្ដួលរំជួល ចិត្ដក៏បានយកប្រេងរំអិលម៉ាស៊ីនដេរ ទៅផឹកអស់កន្លះដបតូចដើម្បីសម្លាប់ ខ្លួនតាមគូស្នេហ៍ដែរ ។ ខណៈនោះនារីជា គូស្នេហ៍បានដួលសន្លប់ស្ដូកស្ដឹងនៅក្នុង ផ្ទះតែម្នាក់ឯង ហើយបន្ដិចក្រោយមក ឪពុកម្ដាយមកដល់ឃើញកូនស្រីសន្លប់ និងបានឃើញមានដបថ្នាំតូចសម្រាប់ ដាក់ប្រេងរំអិលម៉ាស៊ីនដេរនៅជិតនោះ ផង ទើបសង្ស័យថា កូនស្រីពិតជាផឹកប្រេងម៉ាស៊ីនដេរដើម្បីសម្លាប់ខ្លួនតាម គូដណ្ដឹងជាមិនខាន ។ ពេលនោះក្រុម គ្រួសារបានដឹកយកតួអង្គស្រីទៅសង្គ្រោះ ព្រះកុសុមៈ ខណៈដែលតួអង្គប្រុសបាន ស្លាប់នៅក្នុងមន្ទីរពេទ្យនេះ និងបានដឹក យកទៅធ្វើបុណ្យតាមប្រពៃណីនៅឯផ្ទះ រួចទៅហើយនោះ ។ អ្វីដែលធ្វើឱ្យតួអង្គ ស្រីមានសំណាងនោះគឺក្រុមគ្រូពេទ្យបាន ជួយលាងក្រពះ និងចាក់ថ្នាំឱ្យនាងបាន ដឹងខ្លួន និងរួចពីសេចក្ដីស្លាប់ ហើយរឿង រ៉ាវនេះបានធ្វើឱ្យអ្នកដឹងរឿងនាំគ្នាលាន់ មាត់ថា ពិតជាស្នេហាស្មោះស្ម័គ្រដូច ទុំទាវក្នុងរឿងមែន ៕
.jpg)
