Khmer
English
Chinese
Frence
Vietnamese
Thai
ក្រុមការងារធនធានទឹកខេត្ដឧត្ដរមានជ័យ,ខេត្ដស្វាយរៀងបន្ដសកម្មភាពបូមទឹកសង្គ្រោះស្រូវសន្ទូង
ដោយ ៖ សុខ ខេមរា ថ្ងៃទី 17 សីហា 2012ម៉ោង 11:06:25
ខេត្ដស្វាយរៀង-ឧត្ដរមានជ័យ ៖ បើទោះជាមានភ្លៀងបានចាប់ផ្ដើមធ្លាក់ជាបណ្ដើរៗ ដីស្រែសន្ទូង សំណាប របស់ប្រជា កសិករមួយចំនួនទទួលបានទឹកភ្លៀងក៏ដោយ ប៉ុន្ដែក្រុមការងាររបស់មន្ដ្រីធនធានទឹកនៅតែបន្ដសកម្មភាពរបស់ខ្លួនចុះ អន្ដរាគមន៍បូមទឹកសង្គ្រោះស្រូវជាច្រើនទៀត ដែលមានផលប៉ះពាល់បញ្ហារាំងស្ងួតកន្លងទៅ ។
លោកគឹម សាវុធ ប្រធានមន្ទីរធនធានទឹកនិងឧតុនិយមខេត្ដស្វាយរៀង បានឱ្យដឹងថា មកទល់ពេលនេះជាលទ្ធផលក្រុមការងាររបស់មន្ទីរបូមទឹកសង្គ្រោះស្រូវបានចំនួន១១០០ហិកតា នេះបើគិតត្រឹមព្រឹក ថ្ងៃទី១៧ ខែសីហា ឆ្នាំ២០១២ ។ លោកបន្ដថា ក្នុងនោះគឺចុះបូមទឹកអន្ដរាគមន៍នៅក្នុងឃុំចំនួន៧ នៃស្រុកស្វាយជ្រំ ដូចជាឃុំក្រោលគោ, ឃុំស្វាយអង្គ, ឃុំស្វាយយារ, ឃុំអង្គតាសូ, ឃុំដូនសំ, ឃុំតាសួស និងឃុំកំពង់ចម្លង ។ ប៉ុន្ដែកាលពីយប់ថ្ងៃទី១៦ មានភ្លៀងធ្លាក់ច្រើន សន្ទូងនឹងស្រូវប្រជាកសិករទទួលបានទឹកភ្លៀងសម្រាប់បង្កបង្កើនផលមួយចំណែកផងដែរ ។ លោកគឹម សាវុធ បញ្ជាក់ថា ខណៈដែលស្រូវ និងសន្ទូងប្រមាណ១៦៥៣០ហិកតា នៅទូទាំងខេត្ដទទួលរងផលប៉ះពាល់រាំងស្ងួត ប៉ុន្ដែមិនមានលក្ខណៈធ្ងន់ធ្ងរបន្ទាប់ពីមានការចុះអន្ដរាគមន៍បូមទឹកសង្គ្រោះនិងភ្លៀងកំពុងចាប់ផ្ដើមធ្លាក់ជាបណ្ដើរៗហើយនោះ ។
បើតាមការឱ្យដឹងពីលោក ឃិន ញ៉ាណ ប្រធានមន្ទីរធនធានទឹកនិងឧតុនិយមខេត្ដឧត្ដរមានជ័យ មកទល់ថ្ងៃនេះ ក្រុម ការងារបានចុះអន្ដរាគមន៍បូមទឹកសង្គ្រោះស្រូវ សន្ទូង និងសំណាប បាន២៦៧ហិកតា ក្នុងនោះដូចជានៅក្នុងស្រុកចុងកាល់ មានចំនួន៣ឃុំ នៅឃុំជើងពានបាន៦៧ហិកតា ឃុំក្រសាំងបាន១៥ហិកតា ឃុំចុងកាល់បាន២០ហិកតា ។ លោកបន្ដថា ស្រុកបន្ទាយអំពិល ឃុំបេងដែលបូមទឹកនៅភូមិទំនប់ប្រាសាទ៣ និងភូមិគោកកំប៉ុល សង្គ្រោះបាន៨០ហិកតា និងនៅភូមិគោកមន ដូចជាបូមនៅភូមិសិង្ហតានេស, ភូមិគោកមន បានចំនួន៣០ហិកតា ។ ចំពោះក្រុងសំរោង មានការចុះអន្ដរាគមន៍បូមទឹកសង្គ្រោះស្រូវនៅសង្កាត់បុស្បូវ កូនគ្រៀល បន្សាយរាក់ និងសង្កាត់សំរោងបាន៩៥ហិកតា៕
.jpg)
